Ka neulai, ka thunget theih a kipan ka thunget den khat in ” Topa Pasian, ka sangkah na ah nangmah man pilna, ciimna, sia te deih bangin om in siate pahtak theih sang naupang ka suah theih na dingin thupha hong pia in.” hi. Tua mah bangin hong piang takpi hi.
Tan 5 kum in ka siamah nu khat in hong it leh hong paak ta tuam hi. Ka nu’n puan a phan theih lam thei ahih manin khau hong pia zel hi. Tan 6 ciang in siamah dang khat mah in zong it cih takin hong it in tuni ciang dong kizom lai hi ung. Amah pen tek ta in deihsak na tawh a kidim mikhat hi. Kei leh kei ka kimuang loh, pil ka kisak loh hang aman tha hong pia den in khangto mah mah hiteh hong ciden hi.
Tan 7 leh 8 pen middle school hita in ka siamah nu kum 2 sung bang nei ka hih manin hong tel mah mah hi. Kei maa in ka U thei ahih manin, ka U vang zong tawh hong it tuam hi. Tan 8 na a kum lang in, inn nei ka hih man un, sang ki tuah kul ta hi. Ka siamah nu in hong mangpha khak na dingin pizza leh dawn theih tui tuam tuam tawh hong taih hi. Sang ka kituah khit ciangin tan 8 kum lang ah hong pakta ding sia khat kei adingin na om hi. English khan hi in, ka lai zong hanciam ka hih manin tua khan sungah mi etteh dingin ka min hong lo zel in, mat tam pen tawh pahtawina hong pia hi.
High School kah ta. Ka tan 9 ciangin ka English siamah nu in hong hehpih, lai hanciam leh thumang hong sa ahih manin hong it tuam hi. Ama muhna ah ka kisap te aman hong pia zel hi. Christmas hun ciangin zong kei bek hilo ka sanggam te adingin zong letsong hong pia hi. Nikhat phalbi hun sung, fire drill kisinna om in a pua ah kipai khia a, puantung silh silh lo ka hih manin aman a zing ciangin puantung silh a thak khat hong pia hi. Tua bek tham lo, ama neih sa bilbah, silh leh ten cih dan zong hong pia thei zel hi. Khat vei vei ciang bang ka puakna ding ka bag awng nawn lo ahih manin khen nih ka suah thei zel hi. Tan 10 kum man ciangin aman pension la ahih manin ka kizom nawn kei uh hi.
Tan 11 pan 12 ciang in ama za a luah ding siamah khat Pasian in hong pia thuah hi. Amah pen ka puan khui siamah hi. Kei leh ka lawmnu pen hong it bawl in hong huh theih zah in hong huh a, ko zong ama kisap bang bang huhna ka pia uh hi. Ama makaih kipawlna ah a sum zonna: moh bawl, kimawl na a om ciang moh zuak, puan khui a kipan, puan tungah lim bawl cih dan te ko gel in huh in, khat vei vei ciang nitak nai 8 nai 9 kiim in inn ka ciah uh hi a, khatvei vei lah zingsang khan kipat ma, ahuh dingin ka pai baih uh hi. Khualzin ding khawng hong sam pah pah a, kei leh ka lawmnu in tua hun khawngin sang pelh nuam lo ka hih man un nawng kai ka sa thei zel uh hi. Khualzin nading in sum zong ka neih mel loh uh lam hong thei a, tampi ka piak khak lohna ding un hong geel sak zel hi. Hih kipawl na in, sum a ngah na no mau sep sa hi ci in hong khiam hi.
Ama hong gen den thu khat in , “tun hun nuam takin na zat kei vua leh high school na man uh ciangin hibangin hun awng leh hun nuam zang kha nawn lo ding hi uh teh” hong ci hi. Tun hunte hong pai pai ciangin tualai hunte ka phawk a, ka siamah nu’n khua ka muh ding uh hong deihsak na te zong ka telsiam sem sem hi. Mun tuam tuam leh thu tuam tuam ka muh khak na zong ka siamah nu hang ahih manin tudong ama tungah lungdam ka ko hi. Tuabang siamah hong pia Pasian tungah zong ka lungdam.
Hih thu ka deihna a bulpi in, kei phawk loh sa in, Pasian in ka thungetna hong dawng na hi mawk hi. Khat veivei ciang thupha sang lua kisa, i thunget hong tang tun lam bang ki phawk kha lo zel hi. Ahi zongin Pasian pen a thuman Pasian hi a, I thunget nate za in hong dawng a, ei I lunggulh zah sangin a hoihzaw hong pia Pasian hi.
Leave a Reply